आमची यशोगाथा

वडिलांचं छत्र हरवलं आणि नियतीनेही डोक्यावरचं घराचं छप्पर काढून घेतलं. तिथून पुढं सात वर्ष एक आई आपल्या दोन चिमुकल्या मुलांना घेऊन सांगली शहरातील कृष्णा नदीच्या काठावर एका पिंपळाच्या पारावर आपला संसार थाटून मोलमजुरीची कामे करत आपल्या पिलांना वाढवत होती. पायाखाली रोज ठेच लागणारी जमीन आणि डोक्यावर होतं अमर्याद आकाश!
अशा परिस्थितीत लहानाचा मोठा झालेला हरिभाऊ कुलकर्णी नावाचा माणूस परिस्थितीच्या टक्क्याटोणप्यानी जे शिकवलं ते सकारात्मक वृत्तीनं घेत शिकला... पण अमर्याद निरभ्र आकाशाने त्याला एकच ब्रीद वाक्य शिकवलं 'स्काय इज द लिमिट'. अगदी लहान वयात रामगाड्यासारखा राबणाऱ्या हरिभाऊंनी कष्टालाच आपला देव मानलं.